Bawat dating ng baraha’y sinisilip,
Tinitingnan kung may swerteng kalakip,
Binibilang kung ilan ang pagitan
At kung may baryang pang maipupuhunan.
Di malaman kung swerte bang matatawag
Pagkat toreng nahamig, bigla na lang nabubuwag.
Di malaman kung malas ba’t inaalat
Pagkat minsan nama’y nakakabagat.
Di sigurado kung ako’y susugal
Pagkat madalas sa iyo’y nasusupalpal.
Ang panalong ipinapatikim mo sa akin,
Bigla mo rin palang babawiin.
Gaano ba kalaki ang dapat itaya
Upang maisubi hinihintay na gantimpala?
Napapagod na sa kakaasa
Na aayon sa akin at gaganda ang balasa.
Kay tagal ko nang sa iyo’y nakikipaglaro.
Kailan kaya ako susuko?
Kapag wala nang panaya at puhunan?
O pag puso ko’y pagod nang lumaban?
No comments:
Post a Comment